hasil-e-zabt-e-fughan nakam hai
ab to ḳhamoshi pe bhi ilzam hai
koi avaz-e-shikast-e-jam hai
tauba tauba har taraf kohram hai
ye bhi faiz-e-gardish-e-ayyam hai
sub.h hai apni na apni shaam hai
dil hua tark-o-talab se be-niyaz
ab yahan aram hi aram hai
bahr-e-tufan-ḳhez ka sahil kahan
ishq ka aghaz be-anjam hai
ranj koi shai na koi shai ḳhushi
muḳhtalif ehsas ka ik naam hai
phir kisi ne aane ka va.ada kiya
sub.h se phir intizar-e-sham hai
sha.eron men yuun to apna bhi ‘figar’
naam hai lekin bara.e naam hai
Leave a Reply