tasavvurat ki duniya saja.e baiThe hain
kisi ki aas ko dil se laga.e baiThe hain
fareb umr do roza ka khaa.e baiThe hain
bata.en kya ki jo sadma uTha.e baiThe hain
na jaane kis ghaḌi aa jaa.en DhunDte ham ko
charagh din men bhi dar par jala.e baiThe hain
suna hai jab se dua.en qubul hoti hain
dua ko haath ham apne uTha.e baiThe hain
vo aa rahe hain koi kah raha hai kanon men
charagh diid ka ham to bujha.e baiThe hain
gharib-ḳhane ki saari faza mo.attar hai
ye lag raha hai vo aa.e hain aa.e baiThe hain
na puchh kaise shab-e-intizar guzri hai
na chheḌ ham ko saba ham sata.e baiThe hain
ḳhabar kahan hai zamane ki ‘soz’ ham us ko
kisi ke ishq men ḳhud ko bhula.e baiThe hain
Leave a Reply