nahin kahte kisi se hal-e-dil ḳhamosh rahte hain
ki apni dastan men tere afsane bhi aate hain
vo jin par faḳhr hai farzangi ko nukta-dani ko
tiri mahfil men aise chand divane bhi aate hain
adab karta huun masjid ka vahan har roz jaata huun
ki us ki raah men do-char maiḳhane bhi aate hain
hamare mai-kade men mai bhi hai iman ki baten bhi
yahin to ek sahab va.az farmane bhi aate hain
na ghabra chahne valon se ye to ain-e-fitrat hai
ki sham.a nur-afshan ho to parvane bhi aate hain
Leave a Reply