Har Ek Chehre Pe Dil Ko Guman Us Ka Tha

Tajdar Adil

har ek chehre pe dil ko guman us ka tha

basa na koi ye ḳhali makan us ka tha

bahut dinon se mujhe yaad bhi nahin aata

tamam-umr hi mujh ko dhiyan us ka tha

main be-jahat hi raha aur be-maqam sa vo

sitara mera samundar-nishan us ka tha

main us tilism se bahar kahan talak jaata

faza khuli thi magar asman us ka tha

phir us ke ba.ad koi baat bhi zaruri na thi

mire ḳhilaf sahi vo bayan us ka tha

tamam dukh miri ankhon men bujh ga.e lekin

jo dhire dhire jala tha nishan us ka tha

mohabbaton ki kahani men kaun shamil hai

mujhe to barha ḳhud par guman us ka tha

hava ne ab ke jala.e charagh raste men

ki meri raah men ‘adil’ makan us ka tha