kuchh hashr se kam garmi-e-bazar nahin hai
vo jins huun main jis ka ḳharidar nahin hai
is raat ke gambhir andhere men hai kya kya
hasil tujhe par dida-e-bedar nahin hai
mumkin ho to siine men utar kar to mire dekh
vo laash huun main jis ka aza-dar nahin hai
ik tere taghaful ne kamar toḌ ke rakh di
varna gham-e-duniya to mujhe baar nahin hai
hansta hai mire sina-e-sad-chak pe kya kya
vo jis ke gareban men ik taar nahin hai
dil ḳhugar-e-gham kaun sa gham pa ke jiyega
varna tujhe paana mujhe dushvar nahin hai
kis munh se amaan chahunga suraj se dobara
sad-shukr ki yaan saya-e-divar nahin hai
chahega kise kis ka vafadar rahega
ye dil jise ḳhud se bhi abhi pyaar nahin hai
kya lutf hai rakhta hai sar-e-lutf-o-karam bhi
‘shohrat’ ki tire gham ka saza-var nahin hai
Leave a Reply