Afsar Mahpuri
kya bataen hal-e-dil un ki shanasai ke baad
habs badhta hi chala jaata hai purvai ke baad
ek muddat par khayal un ka kahan se aa gaya
kitni achchhi anjuman lagti hai tanhai ke baad
jab nazar aaya na sahil un ki chashm-e-naz men
kya dikhai dega vo dariya ki gahrai ke baad
dar-ba-dar ki thokaren khain mohabbat men to kya
ho gae ham mohtaram kuchh aur rusvai ke baad
ham kahan honge na jaane is tamasha-gah men
kis tamashai se pahle kis tamashai ke baad
un ke baare men faqat itna hamen maalum hai
ab vo rahte hain hamare dil ki angnai ke baad
khuub hai ‘afsar’ hamen apni haqiqat ki khabar
kya hamara nala-e-dil un ki shahnai ke baad
Leave a Reply