aap danista jo katra ke guzar jaate hain
mere ehsas men sau dard utar jaate hain
paas aa kar bhi agar paas na aa.e koi
ham shab-e-vasl ki tanha.i men mar jaate hain
kya ajab daur-e-pur-ashob hai jis men ai dost
log dastar bachate hain to sar jaate hain
jab pasine ka ḳharidar na ho tab mazdur
shaam ko nazren jhuka.e hue ghar jaate hain
zaḳhmi lafzon pe bhi hans hans ke agar daad mile
ham se sha.ir to usi vaqt hi mar jaate hain
apne mahbub se milne ke liye roz ‘sabin’
tum ko ma.alum hai ham chand-nagar jaate hain
Leave a Reply