titliyan jugnu shajar ḳhushbu parinde chhoḌ kar
hans rahi huun ḳhvab saare main adhure chhoḌ kar
jis ki ankhon ne likha tha aḳhiri nauha mira
vo gaya bhi to gaya hai sab se pahle chhoḌ kar
DhunDhti phirti huun apne aap ko kuchh is tarah
aa ga.i huun jis tarah main ḳhud ko pichhe chhoḌ kar
kaTne hain ratjage paḌhte hue divan-e-mir
jagna hai umr bhar ninden sirhane chhoḌ kar
rah ga.iin viran kachchi si saḌak par hichkiyan
chal paḌi gaaḌi kisi ke haath hilte chhoḌ kar
dekh le main ne mukammal kar liye hain aḳhirash
tu gaya tha mujh men apne naqsh aadhe chhoḌ kar
Leave a Reply