tha jo ik kafir musalman ho gaya
pal men virana gulistan ho gaya
chhup ke pi thi kal jahan pe shaiḳh ne
us jagah qaa.em ḳhumistan ho gaya
chara-gar ki ab nahin hajat mujhe
dard hi ḳhud baḌh ke darman ho gaya
mujh pe koi ho gaya hai mehrban
qatl ka ab apne saman ho gaya
hai taghaful hi ka tere faiz kuchh
rafta rafta main ghazal-ḳhvan ho gaya
mujh ko is mahfil men jaana hi na tha
dil fida-e-ru-e-ḳhuban ho gaya
bevafa se ishq ka anjam hai
ye jo ‘ḳhushtar’ ḳhun-e-arman ho gaya
Leave a Reply