Tha Jo Ek Kafir Musalman Ho Gaya

thā jo ik kāfir musalmāñ ho gayā

pal meñ vīrāna gulistāñ ho gayā

chhup ke pī thī kal jahāñ pe shaiḳh ne

us jagah qaa.em ḳhumistāñ ho gayā

chāra-gar kī ab nahīñ hājat mujhe

dard hī ḳhud baḌh ke darmāñ ho gayā

mujh pe koī ho gayā hai mehrbāñ

qatl kā ab apne sāmāñ ho gayā

hai taġhāful hī kā tere faiz kuchh

rafta rafta maiñ ġhazal-ḳhvāñ ho gayā

mujh ko is mahfil meñ jaanā hī na thā

dil fidā-e-rū-e-ḳhūbāñ ho gayā

bevafā se ishq kā anjām hai

ye jo ‘ḳhushtar’ ḳhūn-e-armāñ ho gayā

Leave a Comment