samundaron se kabhi dasht se guzarne men
hue tamam safar zindagi ka karne men
bas us ne aa ke zara aa.ine ko dekha tha
zara si der lagi raushni bikharne men
bichhaḌna shaḳh se kal bhi hai aur aaj bhi hai
to andhiyon se bhala kya rakha hai Darne men
main be-sabab hi muḳhatab hua dariche se
naha raha tha vo yadon ke ek jharne men
bas ek pal ki tamanna-e-vasl ki ḳhatir
tamam-umr laga di ga.i sanvarne men
ye aur baat junun ko sukun mile mile na mile
tabib lag to ga.e ek zaḳhm bharne men
na jaane saare parinde kahan hue gha.eb
maza raha hi nahin saa.e men Thaharne men
Leave a Reply