chashm-e-gardun phir tamazat apni barsane lagi
phir zamin minna-kash-e-dariya nazar aane lagi
phir jahan-e-taza ki ham justuju karne lage
phir ḳharabe men tabi.at apni ghabrane lagi
kya mayassar aa gaya mujh ko hava ka iltifat
ab miri avaz shayad duur tak jaane lagi
manzar-e-ḳhush-rang se ukta ke aḳhir ye nazar
apni avara-mizaji ki saza paane lagi
phir kisi ke dar pe ḳhushbu de rahi hai dastaken
phir koi aahaT mire kanon se Takrane lagi
Leave a Reply