Rashid Anwar Rashid
vo aur log the jo raste badalte rahe
safar hai shart so ham niind men bhi chalte rahe
pighal raha tha yugon se vajud ka laava
ḳhayal-o-ḳhvab mire pattharon men Dhalte rahe
unhen qubul miri rahbari na thi lekin
muḳhalifin mire saath saath chalte rahe
jinhen nasib hua un ko baḳhsh di raunaq
main jin ke haath na aaya vo haath malte rahe
agarche zauq-e-safar men kami nahin aa.i
qadam qadam pe magar zaviye badalte rahe
ubhar jo aa.e sar-e-sham atishin lamhe
safar men barf-badan der tak pighalte rahe
Leave a Reply