bhare-pure se makan men bhi ‘shah’ tanha hai
rida-e-shab ke kinare pe ek taara hai
bas ek lamha tha haa.il tujhe bhulane men
ye kis maqam pe tera ḳhayal aaya hai
tamam gard hai chehra thaki thaki ankhen
udasiyon ka ye badal bahut ghanera hai
shab-e-siyah men hai teri hi yaad ka lapka
nigah Thokaren khati hai ghup andhera hai
nazar ki raah men be-manzari si phaila kar
vo ik sitara sar-e-sham Duub jaata hai
vo ek lamha-e-be-iḳhtiyar jab main ne
tujhe chhua tha miri ungliyon men jalta hai
us ek vahm ne zinda rakha kabhi meri
nazar ka lams tujhe gudgudane vaala hai
ḳhuda ko saunp ke ruḳhsat hua tha tu mujh se
mujhe ḳhuda hi ne ab tak sambhal rakkha hai
tu aaj samne aa.e to kaise pahchanun
miri nazar men to ab tak vahi sarapa hai
Leave a Reply