Sheen Kaaf Nizam
mere alfaz men asar rakh de
sipiyan hain to phir guhar rakh de
be-ḳhabar ki kahin ḳhabar rakh de
hasil-e-zahmat-e-safar rakh de
manzilen bhar de aankh men us ki
us ke pairon men phir safar rakh de
chand-lamhe koi to susta le
raah men ek do shajar rakh de
gar shajar men samar nahin mumkin
us men saaya hi shaḳh-bhar rakh de
kal ke aḳhbar men tu jhuTi hi
ek to achchhi si ḳhabar rakh de
tu akela hai band hai kamra
ab to chehra utaar kar rakh de
Leave a Reply