ahmad-shanas

Bas Ek Jahan-e-Tahayyur Se Aane Wala Hai

bas ik jahan-e-tahayyur se aane vaala hai

vo ajnabi mujhe apna banane vaala hai

gulab sang ki surat dikhane vaala hai

kahan kahan vo mujhe azmane vaala hai

koi to dekhne vaala hai meri ankhon se

koi to hai jo tamasha dikhane vaala hai

ye chand aur sitare to ik bahana hain

kuchh aur hai jo yahan jagmagane vaala hai

har ek jism yahan ruuh ki alamat hai

ye regzar bhi naghma sunane vaala hai

bas ik saval ki takhliq hai bashar jaise

kahan se aaya hai kis or jaane vaala hai

use khabar hai kahan raushni ka makhaz hai

vo tirgi men dilon ko jalane vaala hai

amiir us ki amanat utha nahin sakta

faqir asal men us ka khazane vaala hai

vo ek pyaas ka lamha jo mere andar hai

kabhi kabhi to samundar lutane vaala hai

vo khaksar ko deta hai phuul hisse men

vo sang-zar men dariya bahane vaala hai

bahut aziiz hai zer-o-zabar ka khel use

bujha bujha ke tamanna jagane vaala hai

vo ek gauhar-e-yakta hai mere sagar men

vo ek ashk ki ankhon men aane vaala hai

samar ko bandh ke rakhta hai vo darakhton par

jo pak gaya use niche girane vaala hai

vo apne aap hi ghar laut aaega ‘ahmad’

kisi ko kaun hamesha bulane vaala hai

More Poems

Leave a Comment