Furqat Ka Fusun Phail Gaya Sham Se Pahle

furqat kā fusūñ phail gayā shaam se pahle

anjām nazar aatā hai anjām se pahle

ham jaur-o-sitam sah ke bhī shikva nahīñ karte

aur morid-e-ilzām haiñ ilzām se pahle

is vāste siine se lagāyā hai tirā ġham

miltī nahīñ rāhat kabhī ālām se pahle

ai dost gavārā hai mujhe ishq meñ sab kuchh

kuchh aur bhī kah lījiye badnām se pahle

taslīm hai rusvā.ī sabab is kā huā kaun

āñkhoñ meñ namī aa.ī tire naam se pahle

kho baiThā huuñ sab hosh-o-ḳhirad ek nazar meñ

aisā hī ḳhumār aayā mujhe jaam se pahle

dīdār ke tālib the ‘nazar’ ho ga.e mahrūm

dīvār thī ashkoñ kī dar-o-bām se pahle

Leave a Comment