Mushaf Iqbal Tausifi
ham the kisi ka dhyan tha vo bhi nahin raha
ik rabt-e-jism-o-jan tha vo bhi nahin raha
jhagḌa tha mera jis se vo duniya kidhar ga.i
ik shaḳhs darmiyan tha vo bhi nahin raha
misl-e-charagh tirgi-e-jism-o-jan men dil
ik shahr-e-be-nishan tha vo bhi nahin raha
inTen bichhi thiin jis men vo ik tang si gali
us men mira makan tha vo bhi nahin raha
duniya miri nahin na sahi tum to saath ho
kya kya hamen guman tha vo bhi nahin raha
nuqta bani nigah se ojhal hui zamin
sar par ik asman tha vo bhi nahin raha
‘mus.haf’ tumhara naam yahin tha aur us pe haan
ik surḳh sa nishan tha vo bhi nahin raha
Leave a Reply