pahle sub.h ka raushan taara sirf hamare dhyan men tha
lekin azm ki lau bhaḌki to suraj bhi imkan men tha
shahr-e-jan se dasht-e-adam tak karb ka mausam saath raha
jaane kis ki khoj men the ham kis ka chehra dhyan men tha
sahr-e-sud-o-ziyan men shor tha ghaTte baḌhte nirḳhon ka
lekin us shaffaf gali ka har lamha nirvan men tha
mahrumi ki barf pighal kar meri ragon men jam jaati
aankh men suraj dar aate hi jism bhi atish-dan men tha
main Thahra ik muflis sha.ir nazr use karta bhi kya
bas ye jivan vaar aaya huun jivan hi imkan men tha
saari umr guzari ‘saghar’ tab ye tilism-e-zat khula
ik chehre ka aks tha mujh men ik chehra gul-dan men tha
Leave a Reply