Shadab Anjum
gar dard men bhi lutf-o-maza DhunD lenge log
mumkin hai zahr men bhi shifa DhunD lenge log
saaya jo de raha hai unhen phal ke saath saath
ik roz us shajar men ḳhuda DhunD lenge log
gum hona chahta huun par is kashmakash men huun
mujh ko na DhunD pa.enge ya DhunD lenge log
kuchh bhi nahin milega suḳhan ke siva unhen
aa kar mire makan men kya DhunD lenge log
un ki gharaz ki baat agar hai to jaan lo
inkar men bhi meri raza DhunD lenge log
nadida ik vaba ne dikhaya hai aa.ina
da.ava hai phir bhi ab-e-baqa DhunD lenge log
hota nahin hai bhiiḌ ka chehra koi magar
is bhiiḌ men bhi apna saga DhunD lenge log
‘anjum’ gunahgar na sabit hua magar
us ke liye bhi koi saza DhunD lenge log
Leave a Reply