Urooj Qadri
ye hai kaun si hikayat ye hai kaun sa tarana
na shikayat-e-gham-e-dil na hikayat-e-zamana
vo asar bhari nasihat vo kalam-e-arifana
ki laga raha ho jaise koi dil pe taziyana
jise kafiri se raghbat jise zauq-e-mulhidana
use kyuun pasand aa.e rah-o-rasm-e-mominana
hai sitam ki dhund chha.i hai jafa ki fasl aa.i
hai chaman pe aisa pahra ki qafas hai ashiyana
mujhe yaad aa rahi hain tiri mahfilon ki baten
vo shikayaton ka daftar vo hikayat-e-shabana
tire hukm se alag ho tire nuur se juda ho
miri zindagi men baaqi nahin aisa koi ḳhana
nazar-e-karam se mujh ko kabhi dekh le vo shayad
mire dil ki aarzu hai vo jamal-e-javedana
hai ‘uruj’ ye sa.adat ye hai jail ki masarrat
ki tihaḌ men ada ho tiri iid ka dogana
Leave a Reply