Nae Zamane Ke Nit-Nae Hadsat Likhna

nae zamane ke nit-nae hadsat likhna

udaas phulon ki zard patton ki baat likhna

falak darichon se jhankte khushnuma manazir

zamin pe be-zariyon men lipti hayat likhna

thakan ka ehsas ho to kar lena yaad us ko

adhure khvabon ki sar-phiri kaenat likhna

siyahi kis ne bikher di kore kaghazon par

ki ujle alfaz kha gae kaise maat likhna

ye kaun us ki kahaniyan phir suna raha hai

kahan se aai hai khushbuon ki barat likhna

andhere raste men raushni ki sada se pahle

ye kis ne kandhe pe rakh diya apna haat likhna

ujale farda ke DhunDhti hain thaki nigahen

ye kin hisaron men qaid hai apni zaat likhna

bhatak gai hai chahar samton men soch kyuun kar

ki zehn-o-dil par laga gaya kaun ghaat likhna

kalam tera fasurda chehron ka aaina ho

tu apne ashar men har ik dil ki baat likhna

use ye zid thi ki din ko likhun main raat ‘anjum’

mujhe na manzur tha kabhi din ko raat likhna

Leave a Comment