sho.ale se chaTakte hain har saans men ḳhushbu ke
aa.i hai saba shayad vo phuul sa tan chhu ke
ehsas ke jangal men ik aag bhaḌakti hai
jhonke kisi gulshan men hain raqs-kunan lu ke
auron ne bhi puuja hai ai dost tujhe lekin
yaksan to nahin hote jazbat man-o-tu ke
ye ahd-e-tamanna bhi ik daur-e-qayamat hai
jab husn piye aansu aur ishq lahu thuke
ham ḳhosha-e-gandum ko jannat se yahan laa.e
phir bhi tire divane duniya men rahe bhuke
vo dard ko chinta tha palkon se sitaron ko
naghmon men badalta hai ehsas ke lab chhu ke
kuchla hai bahut dil ko sangin haqa.eq ne
phir bhi na ‘zafar’ bhule qisse ruḳh-o-gesu ke
Leave a Reply