nigah-e-naz tiri jab se karsaz nahin
jigar men dard nahin qalb men gudaz nahin
nafas nahin koi aisa ki jan-gudaz nahin
ye mera ishq hai zahid tiri namaz nahin
jise farishton se qudrat chhupa ke rakhti hai
sharab-ḳhane men vo raaz koi raaz nahin
havas ki zindagi-e-javedan pe la.anat hai
bala se umr-e-mohabbat agar daraz nahin
ta.alluqat mohabbat ki jaan hoti hai
vo ik nigah ba-zahir jo dil-navaz nahin
tiri jafaon pe hai naaz jis qadar mujh ko
mujhe vafaon pe bhi apni itna naaz nahin
agar kisi ki mohabbat men koi raaz na ho
to phir kisi ki mohabbat to koi raaz nahin
nigah bhi jurm kabhi jurm-e-be-nigahi bhi
kisi usuul pe vo jalva-gah-e-naz nahin
main be-niyaz sahi tum se bhi mohabbat main
magar tumhari mohabbat se be-niyaz nahin
tum apne husn ki kha kar qasam mukar jaao
agar tumhari mohabbat ko mujh pe naaz nahin
kal un ke jalvon pe tha mera iḳhtiyar-e-nazar
aur aaj apni nazar ka bhi men majaz nahin
nigah-e-naz ke allah re ye ghalat andaz
koi ye samjhe abhi un ko mashq-e-naz nahin
suna.i deti hai mahsus jan-o-dil ho kar
vo ik sada jo hanuz ashna-e-saz nahin
tumhari bazm ki ye dost-dariyan tauba
kisi se jaise kisi ko kuchh ehtiraz nahin
khula hua hai vo bab-e-qubul-e-mai-ḳhana
agar nahin dar-e-tauba bala se baaz nahin
tiri ada-e-taghaful ki jaan se zalim
vo ik ada tiri jis par tujhe bhi naaz nahin
ab apne jalvon ka lillah ehtiram muaaf
nigah-e-shauq ko ab tab-e-imtiyaz nahin
dobara kis se mili ishq ki nigah-e-garm
zamana-soz hai ‘bismil’ zamana-saz nahin
Leave a Reply