Rishi Patialvi
sameT kar tiri yadon ke phuul daman men
basa raha huun baharon ko dil ke gulshan men
abhi ziya-e-tasavvur se aankh raushan hai
abhi bahar-e-charaghan hai dil ke angan men
tire baghair hai be-rang raunaq-e-gulshan
ye aur baat ki khulte hain phuul gulshan men
ghaTaon se to barasti hon bijliyan jaise
kahan se a.engi ThanDi hava.en savan men
chhupa diya miri nazron se ḳhud mujhe us ne
utar ga.i hai jo tasvir dil ke darpan men
kahin nazar men nahin duur duur tak sahil
bhanvar ki naav ke manind jaan hai tan men
qarib-e-dil bhi hain vo duur bhi hain nazron se
kuchh apne-pan ki jhalak bhi hai ajnabi-pan men
ruki ruki si hai raftar-e-zindagi jaise
hazar ḳhuun ragon men hai jaan hai tan men
baras paḌe miri ankhon se yak-ba-yak aansu
kisi ki yaad jab aa.i baraste savan men
pata nahin hai ‘rishi’ duur duur manzil ka
kidhar ko jaa.en hamen raat ho ga.i ban men
Leave a Reply