Poet
tira va.ada tha va.ada rah gaya hai
hamara sabr takta rah gaya hai
vahi hai dard ankhon men abhi tak
jo tujh se ishq aadha rah gaya hai
mire vo zaḳhm saare bhar ga.e the
magar dil phir bhi TuuTa rah gaya hai
adhure ḳhvab saare miT ga.e hain
tumhara naam likkha rah gaya hai
ravana kab se gaaḌi ho ga.i hai
hamara haath hilta rah gaya hai
musavvir Thiik hai tasvir saari
mira chehra kyuun saada rah gaya hai
ghazal ‘iqra’ mukammal ho chuki hai
magar sar hai ki dukhta rah gaya hai
Leave a Reply