mai-e-kausar ka asar chashm-e-siyah-fam men hai
saqi-e-mast ajab kaif tire jaam men hai
dekhiye faisla-e-yas-o-tamanna kya ho
sub.h-e-mahshar ki jhalak tirgi-e-sham men hai
nigah-e-mast ka phir zohd-shikan duur chale
phir Dhale bada-e-sarjosh jo is jaam men hai
chha ga.e sheva-e-bedad pe dilkash naghme
main qafas men huun ki sayyad mire daam men hai
mutma.in ḳhud hi nahin phir asar-andaz ho kya
pand-e-va.iz abhi andesha-e-anjam men hai
aarzu lutf talab ishq sarasar nakam
mubtala zindagi-e-dil inhin auham men hai
Leave a Reply