Gar Hun Mansur to Suli Pe chaDha De Mujhko

gar huuñ mansūr to suulī pe chaḌhā de mujh ko

aur huuñ suqrāt to lā zahr pilā de mujh ko

vasl kā gul na sahī hijr kā kāñTā hī sahī

kuchh na kuchh to mirī vahshat kā sila de mujh ko

kab talak aur jalūñ aag meñ tanhā.ī kī

zindagī ab yahī behtar hai bujhā de mujh ko

thartharātī huī palkoñ pe sajāne vaale

ashk-e-be-kār kī mānind girā de mujh ko

Leave a Comment