Poet
jalan dil ki likkhen jo ham dil-jale
zaban-e-qalam men paḌen aable
rah-e-sa.ab-e-ulfat men ghabra na dil
bahut aise pesh a.enge marhale
na din vo tumhare na apna vo sin
tumhare hamare vo din sin Dhale
adam ki bhi kya raah hai be-nazir
chale jaate hain pesh-o-pas qafile
vo ab nimcha kar chuke hain alam
ajal aa chuki sar pe kyun-kar Tale
Thahar ja koi dam ke mehman hain
ḳhabar le hamari chale ham chale
lakiren bhi miT miT ga.iin haath ki
zi-bas ham ne dast-e-ta.assuf male
rahe dil ke arman sab dil men haif
nikalne na paa.e mare hausle
baḌa ho buḌhape ka sab kho diya
na meri javani na vo valvale
gaḌa koi le kar dil-e-muztarib
mazaron men aane lage zalzale
siyah-kariyon men kaTi umr sab
qalam ki tarah sar ke bal go chale
mohabbat buton ki ye dil chhoḌ de
kisi tarah chhati se patthar Tale
shikayat ka mauqa.a na tha vasl men
ki thi raah thoḌi bahut the gile
koi dam men hai naqsh-e-hasti fana
kidhar dhyan hai tera o bavle
kinar-e-lahad men paḌe hain vo aaj
jo aghosh-e-madar men the kal pale
gala tegh-e-qatil se ragḌa kiya
na jhachka zara vaah re manchale
na laaya koi sham-o-gul gor par
lahad men bhi dagh-e-mohabbat jale
chale bagh-e-hasti se ham na-murad
kisi rut men ai gul na phule-phale
azal se hain ushshaq mazbuh-e-husn
jo manind-e-mahi kaTe hain gale
jo fariyadi tere bhi aa nikle vaan
zamin hogi mahshar ki upar-tale
jo abru ke honge ishare yunhi
miri jaan lakhon kaTenge gale
kiye jaa.e kavish palak yaar ki
abhi dil ke phuTe nahin aable
sira men na ghafil ho bandho kamar
chalo saath vaalo chalo ham chale
rahe mera jism-e-misali sahi
bala se ye putla saḌe ya gale
ye sab sar-zamin fitna-angez hai
hazaron hi uThte hain yaan ghalghale
nazar bhar ke phir dekh luun shakl-e-yar
jo aa.i hui meri dam bhar Tale
hamesha raha daagh daagh apna jism
sada misl-e-sarv-e-charaghan jale
falak ko milana tha gar ḳhaak men
to phir naz-o-ne.amat se kyuun ham pale
rahe bar-var shaḳh-e-naḳhl-e-murad
ilahi hamesha to phule-phale
zamane pe afsurdagi chha ga.i
na hain ab vo charche na vo mashghale
musafir huun dilva.unga nazr-e-ḳhizr
jo tai honge raste ke sab marhale
lahu shab se aata hai ashkon ke saath
kaleje ke nasur shayad chhile
basar ho ga.i is tamanna men umr
koi dost yak-rang mujh ko mile
ye kya rog ab ho gaya ‘rind’ ko
ka.i saal udhar tak the change bhale
Leave a Reply