Qamar Iqbal
jo paḌ ga.i thi girah dil men kholte ham bhi
vo baat karta to kuchh us se bolte ham bhi
hava ko kis ne chhua hai jo tujh ko chhu paate
ḳhala men phirte hain rasta TaTolte ham bhi
kahan pe Thahren ki manind-e-barg-e-avara
hava ke dosh pe phirte hain Dolte ham bhi
andhera shahr ki galiyon ka ghar men dar aata
zara jo raat ko darvaza kholte ham bhi
‘qamar’ ye lutf na jiine ka phir hamen aata
lahu main zahr agar ḳhud na gholte ham bhi
Leave a Reply