Mayank Awasthi
falak hai surḳh magar aftab kaala hai
andhera hai ki tire shahr men ujala hai
chaman men in dinon kirdar do hi milte hain
koi hai saanp koi saanp ka nivala hai
shab-e-safar to isi aas par bitani hai
ajal ke moḌ ke aage bahut ujala hai
jahan ḳhulus ne khaa.i shikast duniya se
vahin junun ne uTh kar mujhe sambhala hai
main kho gaya huun tire ḳhvab ke ta.aqub men
bas ek jism mira aḳhiri havala hai
Leave a Reply