hue kyuun us pe ashiq ham abhi se
lagaya ji ko nahaq gham abhi se
dila rabt us se rakhna kam abhi se
jata dete hain tujh ko ham abhi se
tire bimar-e-gham ke hain jo gham-khvar
barasta un pe hai matam abhi se
ghazab aaya hilen gar us ki mizhgan
saf-e-ushshaq hai barham abhi se
agarche der hai jaane men tere
nahin par apne dam men dam abhi se
bhigo rahvega girya jaib o daman
rahe hai astin pur-nam abhi se
tumhara mujh ko pas-e-abru tha
vagarna ashk jaate tham abhi se
lage siisa pilane mujh ko aansu
ki ho buniyad-e-gham mohkam abhi se
kaha jaane ko kis ne menh khule par
ki chhaya dil pe abr-e-gham abhi se
nikalte hi dam uthvate hain mujh ko
hue be-zar yuun hamdam abhi se
abhi dil par jarahat sau na do sau
dhara hai dosto marham abhi se
kiya hai vada-e-didar kis ne
ki hai mushtaq ik aalam abhi se
mara jaana mujhe ghairon ne ai ‘zauq’
ki phirte hain khush-o-khurram abhi se