Sahartab Roomani
baat ki jab ishq ne tahzib ki
tere gham men roz ik taqrib ki
zindagi ko nazm karne ke liye
main nai har harbe se ik tartib ki
chal paḌa phir silsila ta.amir ka
kuchh nahin bas thoḌi si taḳhrib ki
bhuul jaana chahte the so use
yaad karne ki koi tarkib ki
pahle apne aap ko sachcha kaha
aur phir har baat ki takzib ki
saare qisse hain tiri tamsil ke
saari baten hain faqat tashbib ki
aankh bhi be-nur ho jaati magar
dil ne us ke ḳhvab ki targhib ki
Leave a Reply