rujua karte hue apne mudda.a se main
tire alava bhi kuchh maang luun ḳhuda se main
koi charagh agar ho mire ta.aqub men
thakan sameTta ja.un nuqush-e-pa se main
faqir huun isi kuche men ḳhaak phankta huun
sada laga nahin sakta magar haya se main
rukunga ja ke kisi ḳhub-ru ki chaukhaT par
gali men phuul khilata hua dua se main
kabhi kabhi yunhi apne se puchh leta huun
kisi ke khoj men nikla tha kab saba se main
mire baghair mukammal nahin hai ye duniya
ki is qaziye men shamil huun ibtida se main
shaguft hota hua aa.ina hai dil mera
mire ḳhuda abhi mahfuz huun riya se main
ragon men barf bani niind ke pighalne par
tumhen pukarte niklunga nainva se main
suna hai raah men hote hain saya-dar shajar
kabhi milunga kisi dard-ashna se main
laga rahunga yunhi vasl ki tag-o-dau men
marun ki zinda rahun aap ki bala se main
gulab khilne lage hain miri rag-o-pai men
kahunga ja ke chaman men kabhi saba se main
hadaf bana.un kisi surma ko ab ‘sajid’
tamam umr na laḌta rahun hava se main
Leave a Reply