saa.e ke haq men kuchh nahin mere bayan men
jo aap chhupta phirta hai har sa.eban men
ye chhoTe chhoTe shauq bhi us ko rava nahin
jis ko baḌa banaya gaya ḳhandan men
mujh ko hai aadmi se tavaqqo ḳhulus ki
sona talash karta huun miTTi ki kaan men
qad se nahin bana.i hai pahchan jast se
ye farq hai hamari tumhari uThan men
miTTi men milne vaale hain kal us ke chithḌe
uḌti rahe patang bhale asman men
chup rah sake jo aadmi chup ke maqam par
ye ḳhamushi ho zumra-e-fauq-ul-bayan men
ab tak hamen ḳhabar hi nahin thi kamal hai
nikle hain ham bhi aap ke dil-dadgan men
fitrat se kachche-pakke ta.alluq ki baat kya
miTTi ki baas tak nahin pakke makan men
Leave a Reply