dil ko phir banane men vaqt chahiye kuchh to
kirchiyan uThane men vaqt chahiye kuchh to
saath vo nahin pal ka umr bhar ka lagta tha
us ko ab bhulane men vaqt chahiye kuchh to
is qadar nahin asan jitna ham ne samjha tha
hal-e-dil sunane men vaqt chahiye kuchh to
tinka tinka chun chun kar ham ne jo banaya tha
ashiyan jalane men vaqt chahiye kuchh to
aankh ka samundar se kuchh ajiib rishta hai
sail-e-gham bahane men vaqt chahiye kuchh to
dard-e-dil baḌhane ko ek lamha kaafi hai
dard-e-dil ghaTane men vaqt chahiye kuchh to
phir palaT ke jaane ki ham na rakhen ḳhvahish bhi
kashtiyan jalane men vaqt chahiye kuchh to
zaḳhm jo purane hain un ko ham rafu kar len
phir fareb khane men vaqt chahiye kuchh to
jab vajud ka rishta had pe maut ki pahunche
paar us ke jaane men vaqt chahiye kuchh to
Leave a Reply