Zafar Iqbal
yuun to kis chiiz ki kami hai
har shai lekin bikhar ga.i hai
dariya hai ruka hua hamara
sahra men ret bah rahi hai
kya naqsh bana.iye ki ghar men
divar kabhi nahin kabhi hai
ḳhvahish ka hisab bhi laga.un
laḌki to bahut napi tuli hai
dil tang hai paas baiThne se
uThna chahun to rokti hai
hoti jaati hai meri tashkil
juun juun mujh men vo TuTti hai
tasvir-e-ḳhizan lahu men ab ke
piili piili hari hari hai
bahar se chaTan ki tarah huun
andar ki faza men tharthari hai
pairav nahin ek bhi ‘zafar’ ka
kis maz.hab-e-saḳht ka nabi hai
Leave a Reply