Yun to Kis Chiz Ki Kami Hai

yuuñ to kis chiiz kī kamī hai

har shai lekin bikhar ga.ī hai

dariyā hai rukā huā hamārā

sahrā meñ ret bah rahī hai

kyā naqsh banā.iye ki ghar meñ

dīvār kabhī nahīñ kabhī hai

ḳhvāhish kā hisāb bhī lagā.ūñ

laḌkī to bahut napī tulī hai

dil tañg hai paas baiThne se

uThnā chāhūñ to roktī hai

hotī jaatī hai merī tashkīl

juuñ juuñ mujh meñ vo TūTtī hai

tasvīr-e-ḳhizāñ lahū meñ ab ke

piilī piilī harī harī hai

bāhar se chaTān kī tarah huuñ

andar kī fazā meñ thartharī hai

pairav nahīñ ek bhī ‘zafar’ kā

kis maz.hab-e-saḳht kā nabī hai

Leave a Comment