Mushaf Iqbal Tausifi
yaad phir aa.i tiri mausam salona ho gaya
shaghl sa ankhon ka bas daman bhigona ho gaya
ab kisi se kya kahen ham kis liye barbad hain
ab kisi ki kyuun sunen jo kuchh tha hona ho gaya
giit babul ke sunane teri sakhiyan aa ga.iin
main tire bachpan ka ik TuuTa khilauna ho gaya
meri palkon par mire ḳhvabon ki kirchen rah ga.iin
niind ghayal ho ga.i ankhon men sona ho gaya
phir kisi ki yaad kyuun aati hai yarab ḳhair ho
main to aansu ponchh kar ḳhush tha ki rona ho gaya
Leave a Reply