Dil Khauf Mein Hai Aalam-E-Fani Ko Dekh Kar

dil khauf men hai alam-e-fani ko dekh kar

aati hai yaad maut ki paani ko dekh kar

hai bab-e-shahr-e-murda guzar-gah-e-bad-e-sham

main chup huun is jagah ki girani ko dekh kar

hil si rahi hai hadd-e-safar fart-e-shauq se

dhundla rahe hain harf maani ko dekh kar

azurda hai makan men khak-e-zamin bhi

chizon men shauq-e-naql-e-makani ko dekh kar

Leave a Comment