Figar Unnavi
shohrat-e-tarz-e-fughan aam hui jaati hai
koshish-e-zabt bhi nakam hui jaati hai
mast hain aur talab-e-jam hui jaati hai
be-ḳhudi hosh ka paigham hui jaati hai
muskurata hai hasin parda-e-gulshan men koi
aur kali muft men badnam hui jaati hai
qaid men bhi hai asiron ka vahi josh-e-amal
mashq-e-parvaz tah-e-dam hui jaati hai
toḌ kar dil nigah-e-mast na pher ai saaqi
bazm ki bazm hi be-jam hui jaati hai
lab jo khole to gulistan men kali kaun kahe
chup bhi rahti hai to badnam hui jaati hai
mujh ko le ja.egi manzil pe miri sub.h-e-yaqin
laakh raste men mujhe shaam hui jaati hai
navak-andazi-e-janan ka asar hai ki ‘figar’
ek duniya miri hamnam hui jaati hai
Leave a Reply