kis samt muḌ ga.i thi mujhe yaad aa ga.i
haan haan vo raushni thi mujhe yaad aa ga.i
titli jo gir paḌi thi mujhe yaad aa ga.i
sabze ko chumti thi mujhe yaad aa ga.i
yadon ke ek baagh men rakhe junhi qadam
jitni bhi zindagi thi mujhe yaad aa ga.i
pazeb ki sada thi jo dekha to ik pari
paani pe chal rahi thi mujhe yaad aa ga.i
lauT aao to bata.un juda kyuun hue the ham
ik baat sarsari thi mujhe yaad aa ga.i
charḳhe ko kat.te hue aḳhir girah khuli
tasvir jo bani thi mujhe yaad aa ga.i
koyal ki kuuk chalne lagi jab nadi ke saath
kaise vo bolti thi mujhe yaad aa ga.i
mansur se nikal ke jo phaili thi char-su
kis ruḳh ki raushni thi mujhe yaad aa ga.i
Leave a Reply