ahl-e-dil milte nahin ahl-e-nazar milte nahin
zulmat-e-dauran men ḳhurshid-e-sahr milte nahin
manzilon ki justuju ka tazkira be-sud hai
DhunDne niklo to ab apne hi ghar milte nahin
aadmi TukḌon ki surat men hua hai muntashir
vahdat-e-fikr-o-nazar vaale bashar milte nahin
raste raushan hain asar-e-safar ma.adum hain
bastiyan maujud hain divar-o-dar milte nahin
zauq-e-nazzara dilon men dafn ho kar rah gaya
aankh valon men bhi ab ahl-e-nazar milte nahin
baḌh ga.e hain is qadar qalb o nazar ke fasle
saath ho kar ham-safar se ham-safar milte nahin
zehn ki chaTyal zamin se aanch aati hai ‘zahir’
ab yahan ehsas ke rangin shajar milte nahin
Leave a Reply