Poet
ye dauḌ-dhup ba-har-sub.h-o-sham kis ke liye
bas ek naam ki ḳhatir ye naam kis ke liye
mira vajud ba-sad ehtimam kis ke liye
tamam umr jala sub.h-o-sham kis ke liye
yahan to koi nahin unghte diyon ke siva
bhara hai tum ne mohabbat ka jaam kis ke liye
umanD paḌi hai ḳhuda.i ajiib aalam hai
suna gaya vo saza-e-davam kis ke liye
bahut kaThin hai mohabbat ki naz-bardari
vo shaḳhs chhoḌ gaya hai ye kaam kis ke liye
ye rah-o-rasm zamane se kis ki ḳhatir hai
ye har kisi se dua-o-salam kis ke liye
vahi jo ḳhuun ke pyase the kal talak ‘nazim’
ye miThe bol ye shirin kalam kis ke liye
Leave a Reply