ham se vo jan-e-suḳhan rabt-e-nava chahti hai
chand hai aur charaghon se ziya chahti hai
us ko rahta hai hamesha mari vahshat ka ḳhayal
mere gum-gashta ghazalon ka pata chahti hai
main ne itna use chaha hai ki vo jan-e-murad
ḳhud ko zanjir-e-mohabbat se riha chahti hai
chahti hai ki kahin mujh ko baha kar le jaa.e
tum se baḌh kar to mujhe mauj-e-fana chahti hai
ruuh ko ruuh se milne nahin deta hai badan
ḳhair ye biich ki divar gira chahti hai
ham parindon se ziyada to nahin hain azad
ghar ko chalte hain ki ab shaam hua chahti hai
ham ne in lafzon ke pichhe hi chhupaya hai tujhe
aur inhin se tiri tasvir bana chahti hai
Leave a Reply