Sarak Rahi Hai Uski Chilman Masha-Allah Masha-Allah

Ahmad Ali Barqi Azmi

sarak rahi hai us ki chilman masha-allah masha-allah

shayad ab vo dega darshan masha-allah masha-allah

garaj raha hai badal ghan-ghan masha-allah masha-allah

bajti hai us ki paael jhan-jhan masha-allah masha-allah

baras raha hai pyaar ka savan masha-allah masha-allah

dol raha hai jis se tan-man masha-allah masha-allah

chalta phirta hai mai-khana jis ki ye chashm-e-masatana

us ki surahi-dar hai gardan masha-allah masha-allah

apne hi husn pe jaise ho shaida dekh raha hai jalva-e-zeba

samne rakh kar apne darpan masha-allah masha-allah

mor ka raqs use nahin bhata apni chaal pe hai itrata

naach na jaane tedha angan masha-allah masha-allah

ghuncha-o-gul ki hai ye zaban par sab hi fida us sarv-e-ravan par

zikr hai us ka gulshan gulshan masha-allah masha-allah

‘barqi’ hai jis ka divana ho ke fida misl-e-parvana

maar na daale us ki chitvan masha-allah masha-allah