uupar jo parind ga raha hai
niche ka mazaq uḌa raha hai
miTTi ka banaya naqsh us ne
ab naqsh ka kya bana raha hai
ghar bhar ko ye taqcha mubarak
ḳhud chal ke charagh aa raha hai
ab duuri huzuri kya hai sahab
bas jism ko jism kha raha hai
ye vaqt ka ḳhaas aadmi tha
be-vaqt jo ghar ko ja raha hai
ab main nahin raah men to rasta
meri jagah ḳhaak uḌa raha hai
avval vo ghalat banane vaala
aḳhir ko ghalat miTa raha hai
vo qafila aa saka nahin kyuun
rasta bhi to vaan se aa raha hai
Leave a Reply