Sufi

Pyar Ke Tohfe

na jaane kya mila kya hasraten baaqi rahin dil men

abhi duniya se kya kuchh aur lena hai

mujhe to ye khabar hai

ye dahakti aag

sab kuchh khaak kar degi

faqat mera nishan

uthta dhuan

charon-taraf rishton pe maili raakh chhidkata

ye tezabi

rag-o-pai men panapta zahar

maghrurana be-zari

nigah-dari ki divaren khadi karti

ye sab us aag men kyuun jal nahin jaate

abhi duniya se kya kuchh mangna hai

kya jhapatna hai

main saail huun lutera huun

hui hai maskh yuun surat ki pahchani nahin jaati

main kab tak jhonkta jaunga ye tanur

lahki aag se kab nuur phutega

koi nannhi kiran dhimi si lau

mujh se kahen to chandni phaile

main kab duniya ko lautaunga us ke pyaar ke tohfe

More Poems

Leave a Comment