Mimbaron Par Bhi Gunahgar Nazar Aate Hain

mimbaroñ par bhī gunahgār nazar aate haiñ

sab qayāmat ke hī āsār nazar aate haiñ

in masīhāoñ se allāh bachā.e ham ko

shakl-o-sūrat se jo bīmār nazar aate haiñ

jaane kyā TuuT gayā hai ki har ik raat mujhe

ḳhvāb meñ gumbad-o-mīnār nazar aate haiñ

maat dete haiñ yazīdoñ ko lahū se ham hī

ham hī nezoñ pe har ik baar nazar aate haiñ

aañkh kholī hai fasādāt meñ jin bachchoñ ne

un ko ḳhvāboñ meñ bhī hathiyār nazar aate haiñ

Leave a Comment