Anjum Usman
main tujh par munkashif ho ja.un ye mujh par garan hai
ḳhasara sa ḳhasara ta-ba-imkan sab ziyan hai
ye chashm-e-nam ki ḳhunaba-fishani tham rahe to
khule ashkon ki tughyani ka sar-chashma kahan hai
charagh aise tah-e-farsh-e-zamin rakkhe ga.e the
falak ki maang men ik jhilmilati kahkashan hai
tiri ankhon se le kar hai shikam tak bhuuk raqsan
to phir nan-e-javin ka da.era hi kul jahan hai
hui ab raftani teri ḳhalish to kya ye samjhun
ki kuchh baaqi nahin ab tere mere darmiyan hai
kiya inkar jab qaid-e-qafas se tab khula ye
par-e-parvaz ki had to karan-ta-ba-karan hai
tah-e-dam-e-asiri bhi riha.i ki tamanna
miri sahmi hui ankhon men ab tak pur-fishan hai
kahan ka ishva-o-ghamza-o-nazish aah ‘anjum’
ki mera mehrban mujh par abhi na-mehrban hai
Leave a Reply