Andaz Hu-Ba-Hu Teri Aawaz-E-Pa Ka Tha

andaz hu-ba-hu tiri avaz-e-pa ka tha

dekha nikal ke ghar se to jhonka hava ka tha

is husn-e-ittifaq pe lut kar bhi shaad huun

teri raza jo thi vo taqaza vafa ka tha

dil raakh ho chuka to chamak aur badh gai

ye teri yaad thi ki amal kimiya ka tha

is rishta-e-latif ke asrar kya khulen

tu samne tha aur tasavvur ḳhuda ka tha

chhup chhup ke ro.uun aur sar-e-anjuman hansun

mujh ko ye mashvara mire dard-ashna ka tha

uttha ajab tazad se insan ka ḳhamir

aadi fana ka tha to pujari baqa ka tha

tuuta to kitne aina-ḳhanon pe zad padi

atka hua gale men jo patthar sada ka tha

hairan huun ki vaar se kaise bacha ‘nadim’

vo shaḳhs to gharib o ghayur intiha ka tha

Leave a Comment