main us se duur raha us ki dastaras men raha
vo ek shoale ki surat mire nafas men raha
nazar asiir isi chashm-e-mai-fashan ki rahi
mira badan bhi miri ruuh ke qafas men raha
chaman se tuut gaya barg-e-zard ka rishta
na aab o gil men samaya na khar-o-khas men raha
tamam umr ki be-tabiyon ka hasil tha
vo ek lamha jo sadiyon ke pesh-o-pas men raha
vo ek shaer-e-ashufta-sar ki mujh men tha
hava ka saath na de kar hava ke bas men raha
kisi khayal ke nashshe men din guzarte rahe
main apni umr ke unnisven baras men raha
Leave a Reply